Ang kulay sa mata ng Masokista

ni Ian Garcia Luminario

Hay! Ang saya ng buhay

Ang saya ang sarap mabuhay

Lalo na pag kasama kita

Haaaaay! Parang ang daming kulay

Asul

Berde

Dilaw

Lila

Rosas

Pula

Puti...

Hmmm

Itim...

Oo! Kasama ang itim.

Kasi ito ang nakikita ko sa tuwing humihinga ako nang malalim.

Kasi ito ang nakikita ko sa tuwing nagdadasal ako nang taimtim.

Itim. Oo, itim... Ang kulay ng dilim.

Dilim na bumabalot sa puso ko

Sa tuwing hahagkan mo ako

At sasabihing "matulog na tayo"

Ito rin ang nararamdaman ko

Sa tuwing iiwan mo ako nang sandali

Kasi sa kanya ka naman uuwi

At naiiwan ako sa pintong humihikbi

Tigib at tikom ang labi

Impit at pigil ang hiningang kumakaway...

Kumakaway... Kumakaway...

Hanggang sa tuluyan ka nang mawalay

Haaaaay! Ang saya ng buhay!

Lalo na kapag nariyan ka na

Pagod at pagal ang hininga

Sabay kukumustahin kita...

Ang sagot mo? "Wala akong gana"

Ako naman tong si tanga

Lalapit at hahagkan ka

Hanggang sa maririnig ko na lang...

"Ano ba! Pwede ba! Gusto Kong magpahinga!"

"Sabi ko nga...niyakap lang naman kita."

"Ang dami mong drama!!!"

... Ngingiti ako sabay "kumain ka na ba?"

Sagot mo? "Sabi nang wala akong gana!!!"

Pinaghanda ko pa naman siya

"Gusto ko na lang magpahinga!"

Hinga... Hinga... Hinga...

Wala naman akong magagawa.

Hindi ako pwedeng magsalita kasi nagsasalita pa siya.

Hindi ako pwedeng mapikon kasi mapipikon siya.

Hindi ako pwedeng magalit kasi magagalit siya.

Hindi ako pwedeng magtago ng lihim dahil may itinatago siya.

Hindi ako pwedeng magreklamo kasi mas magrereklamo siya.

Hindi ako pwedeng maging tama, kasi palaging siya ang tama.

Hindi ako pwedeng kumausap o kumaibigan ng iba kasi may kinakausap siyang iba.

Hindi ako pwedeng magtampo sa kanya dahil magtatampo siya at higit sa lahat...

Hindi ako pwedeng maging masaya dahil masaya pa siya.

Hindi dahil sa akin kundi dahil sa iba.

Kaya sinong tanga???

Bulag. Pipi. At bingi.

Bulag.

Bulag sa katotohanang Hindi niya na ako mahal.

Hindi niya na ako kayang mahalin.

Pipi.

Pipi sa mga gusto Kong ibuladas at ilabas...

Mga pinakakatagong sakit, poot, kirot, sugat na malalim na nakabaon sa puso ko.

Bingi.

Bingi sa mga naririnig na pangungutya at pangaalipusta

Dahil pagkatapos ng araw...

Ang sa pandinig ko lang na malinaw ay...

Ikaw.

Sa mga salitang "ayaw" at hiyaw.

"Ayoko na."

"Hindi ko na kaya."

Mga salitang pikitmata Kong ibinubulong sa hangin.

Hanggang sa tuluyan na akong mahulog sa bangin.

Makita ang dilim.

Ang kulay na itim.